12
MuseoMag N°III 2024
©
éric
chenal
Liliana Francisco: „Mir sinn Deel vu Lëtzebuerg, mee mir sinn awer och Deel vun enger spezifescher Communautéit zu
Lëtzebuerg.“
HYBRID IDENTITÉITEN, PERSÉINLECH
FRÄIHEET AN „GENERATIONAL TRAUMA“
De Steven Cruz an d’Liliana Francisco am Gespréich
Am Kader vun der historescher Ausstellung
La révolution de 1974. Des rues de Lisbonne
au Luxembourg huet den Nationalmusée um
Fëschmaart d’Kënschtler Steven Cruz a Liliana
Francisco invitéiert, sech am Programm ronderëm
d’Ausstellung ze bedeelegen. Iwwer déi nächst
Méint proposéiere se notamment verschidden
Atelieren a Visite-guidéeën an hunn en illustréiert
Begleetheft fir d’Ausstellung entwéckelt. Mir
hunn eis getraff fir iwwert d’Zesummenaarbecht
mam Musée an hire perséinleche Background ze
schwätzen.
Dir sidd jo ganz involvéiert an eiser Ausstellung
iwwert d’Nelkenrevolutioun, déi mir aus enger
Lëtzebuerger Perspektiv ënnersichen. Firwat fillt
dir iech ugeschwat vun dësem Sujet? Wat ass
äre perséinleche Lien mat dësem Kapitel vun der
Geschicht?
Steven: Fir mech ass et ëmmer wichteg wann
d’portugisesch Communautéit zu Lëtzebuerg
ugeschwat gëtt, zumools am Kader vun enger Expo
an zumools well et ëm de 25. Abrëll geet. Dat ass jo
de Grond firwat esou vill Portugisen op Lëtzebuerg
komm sinn. Ech si ganz vill gewuer gi vu Saachen,
déi ech net wosst. Ëmsou méi fannen ech et wichteg,
datt déi Saachen an der Ëffentlechkeet gewise ginn.
Et gëtt nach ëmmer e ganz grousse Stigma mat Por-
tugisen zu Lëtzebuerg, si ginn nach vill diskriminéiert
an net wierklech unerkannt fir dat, wat si sinn. Ge-
nerell fannen ech, datt Portugisen ëmmer e bësse
verklengert ginn. Duerch d’Expo kann ee verstoe
firwat si esou gesi ginn. Et ass mega wichteg, datt
d’Xenophobie, déi d’Portugisen erliewen, ugeschwat
gëtt. Domadder kann ech mech befaassen, well ech
selwer Portugis sinn a meng Eltere jo deemools an
där Zäit heihinner komm sinn.
Liliana: Ech gesinn dat och esou wéi de Steven.
Ech hu jo och de portugiseschen Heritage. Mir sinn
Deel vu Lëtzebuerg, mee mir sinn awer och Deel vun
enger spezifescher Communautéit zu Lëtzebuerg. Et