4 museomag   03 ‘ 2022 
HAPPY BIRTHDAY!  (1/4) 
AM VIRFELD VUM 10. GEBUERTSDAG VUM MUSÉE DRÄI EECHELEN HU MIR 
DÉI FRÉIER AN HAITEG KULTURMINISTEREN OP E RÉCKBLÉCK INVITÉIERT 
Dir Dammen an dir Häre Ministeren, Dir hat 
alleguer eng aktiv Roll als Kulturminister an 
der Kreatioun an an der Gestioun vun eisem 
Musée Dräi Eechelen, deen och gäre vun de Leit 
„Festungsmusée“ genannt gëtt. Erlaabt eis Iech 
op e klenge Réckbléck ze invitéieren. 
Wat fir Souvenire verbannt Dir mam Site vun den 
Dräi Eechelen, éier do de Musée entstanen ass? 
Erna Hennicot-Schoepges: D’Dräi Eechelen war eng 
schéin a romantesch Plaz fir spadséieren ze goen. Déi 
historesch Iwwerreschter vun der Festung, an dann och 
de Bléck op d’Stad sinn aussergewéinlech. 
Octavie Modert: Oh, do war ech nach ganz ganz 
jonk. Mee mech hott spéiderhin ëmmer faszinéiert, 
wéi déi Plaz sech am Laf vun der Zäit entwéckelt hott, 
an déi spannend Resultater vun den Ausgruewungen. 
D’Erna Hennicot-Schoepges war Kulturministesch vun 1995 bis 2004.